Jess við erum jöfn

Guðmundur Bernharð Flosason

Fyrir tæplega ári síðan óskuðum við á auglýsingastofunni Hvíta húsinu eftir jafnlaunavottun, þ.e.a.s. við skiluðum inn umsókn til VR um slíka vottun.
Okkur grunaði að það væri afar hollt fyrir fyrirtæki af okkar stærðargráðu, með starfsmenn á bilinu 37–40 manns, að fara í gegnum það ferli sem þarf til að öðlast vottun af þessu tagi. Einnig vissum við að það yrði mikil áskorun þar sem við erum ekki með skilgreindan mannauðsstjóra.

Lærdómurinn af þessari vegferð kom okkur skemmtilega á óvart og var ávinningurinn af vinnunni mun meiri en við áttum von á. Jákvæðast var þó að fá staðfestingu á því að á okkar vinnustað ríkir jafnrétti, hvort sem það er í formi jafnra launa kynjanna fyrir sambærileg störf, útdeilingu verkefna og ábyrgðar, starfsþróunar eða annarra þátta. Hlutfall kvenna og karla er nákvæmlega 50/50 og í stjórn fyrirtækisins eru tvær konur og þrír karlar. Við erum stolt af þessu og viljum trúa því að jafnrétti sé tvinnað inn í vinnustaðarmenninguna en það er frábært að fá stimpil upp á það líka. Fyrsta konan til að verða formaður Sambands íslenskra auglýsingastofa tók við því kefli á árinu og hún kemur úr okkar röðum. Við erum líka stolt af henni og þeim árangri sem hún hefur nú þegar náð í því hlutverki.


Það er ekki þrautalaust fyrir skapandi einstaklinga á auglýsingastofu að fara í gegnum þetta ferli. Svo mörg „leiðinleg“ hugtök fylgja svona vinnu: verkferlar og flæðirit, vottun og viðmið og starfaflokkun og því um líkt. Fyrstu hugsanirnar voru „er ekki hægt að breyta nafninu á þessu?“,  „er ekki hægt að gera þetta eitthvað meira „sexí“ svo fyrirtæki hreinlega geti hugsað sér að fara í gegnum þetta?


Niðurstaða okkar eftir þetta allt var að það þyrfti sannarlega að markaðssetja betur til smærri fyrirtækja ávinninginn af því að fara í þessa vinnu því hann er svo langt umfram það að vera bara einhver stimpill á plakat. 


Ávinningurinn er nefnilega margþættur og sjálfsagt hlutfallslega miklu meiri fyrir smærri fyrirtæki en stærri, því þetta er lærdómsferli; þjálfun í jafnréttismiðuðum og stefnumiðuðum mannauðsmálum, innleiðing agaðri vinnubragða og alls þess góða sem fyrirtæki getur fengið út úr því að fókusera á mannauðinn og hvað í honum býr. Við lögðum mikla vinnu í að gera okkur að betra fyrirtæki, setja okkur markmið og staðfesta jafnrétti innan okkar raða. Við sjáum ekki eftir einni einustu sekúndu.

Almenn staða mannauðsmála
Lítli þekking hefur verið á stöðu mannauðsmála innan minni fyrirtækja á Íslandi hingað til. Yfirgnæfandi meirihluti fyrirtækja af þessari stærðargráðu eru ekki með starfandi mannauðsstjóra. Sú staðreynd bendir til þess að minni líkur séu á að fyrirtæki með undir t.d. 50 starfsmenn hafi skýra mannauðsstefnu, skilgreind markmið í mannauðsmálum, hafi greint hæfni og fræðsluþörf mannaflans, eigi starfsmannahandbók eða formlegt ferli fyrir mótttöku nýliða og svo mætti áfram telja.

Við höfum ekki tíma!
Það væri örugglega svar margra í forsvari fyrir minni fyrirtæki. Og það er sjálfsagt að einhverju leyti rétt og fer að sjálfsögðu eftir rekstrargrundvelli hvers fyrirtækis fyrir sig. En jafnrétti og það að tryggja jafnan hlut kynjanna í launum fyrir sambærileg störf er á ábyrgð allra í forsvari fyrirtækja af öllum stærðargráðum. Það er ábyrgð samfélagsins og fyrst og fremst þess vegna á ekkert fyrirtæki að skorast undan þeirri áskorun að rýna sinn launastrúktúr og velta fyrir sér hvernig hann varð til, af hverju erum við að borga svona laun og fyrir hvað? Hvert er framlagið og hverjar eru kröfurnar? Ef niðurstaðan endurspeglar jafnrétti, frábært, en ef ekki er aðgerða þörf.

Hér er að finna frekari upplýsingar um jafnlaunastefnu og jafnlaunakerfi.

Höfundur greinar er Anna Kristín Kristjánsdóttir, ráðgjafi hjá Hvíta húsinu.

 


  • 28.03.2018

    Internet of Things

    Sum ykkar gætuð hafa heyrt um Internet of Things eða IoT. Í sífellt nettengdara samfélagi þýðir það að fleiri og fleiri hlutum eru til dæmis gefin stafræn skynfæri sem síðan deila upplýsingum yfir Internetið og geta endað í annaðhvort hlutgerðum eða stafrænum aðgerðum.
    Nánar
  • 14.03.2018

    FÍT tilnefningar Hvíta hússins

    Hvíta húsið fékk fimm tilnefningar í fjórum flokkum í ár.
    Nánar
  • 02.03.2018

    ÍMARK tilnefningar Hvíta hússins

    Hvíta húsið fékk sex tilnefningar fyrir fimm verkefni í ÍMARK að þessu sinni. Hér er smá upprifjun á þessum skemmtilegu verkefnum sem við erum ákaflega stolt af.
    Nánar
  • 16.02.2018

    Elín Helga tilnefnd til stjórnenda­verðlauna

    Elín Helga Sveinbjörnsdóttir, annar framkvæmdastjóra Hvíta hússins, er tilnefnd til stjórnendaverðlauna Stjórnvísi 2018. Verðlaunin eru veitt árlega stjórnendum fyrirtækja sem skara framúr á sínu sviði og er ætlað að „vekja athygli á framúrskarandi starfi stjórnenda, örva umræðu um faglega stjórnun og hvetja félagsmenn til að auka þekkingu sína, hæfni og færni sem stjórnendur."
    Nánar
  • 05.02.2018

    5 bestu auglýsingar Ofurskálarinnar 2018

    Stærsti viðburður bandaríska íþróttaársins fór fram í fimmtugasta og annað skiptið í gær. Tom Brady mistókst að vinna sinn sjötta meistaratitil þrátt fyrir að hafa mætt klæddur eins og aðalpersónan í hollenskri Terminator-endurgerð og Prins var varpað upp á risavaxið lak meðan Justin Timberlake þóttist spila á píanó. Leikurinn þótti hin besta skemmtun, en við höfðum auðvitað miklu meiri áhuga á því sem gerðist milli þess sem blásið var í flautuna; auglýsingunum!
    Nánar
  • 22.01.2018

    Ofurskálin - dýrustu sekúndur auglýsingaheimsins

    4. febrúar nk. fer fram stærsti íþróttaviðburður ársins í Bandaríkjunum en þá keppa Philadelphia Eagles og New England Patriots til úrslita í NFL deildinni um Ofurskálina eða Super Bowl. Keppnin er stærsti sjónvarpsviðburður Bandaríkjanna og auglýsingaplássin eftirsótt og nota mörg stóru fyrirtækjanna þarlendis tækifærið til að frumsýna nýjar auglýsingar í þessu plássi.
    Nánar
  • 12.01.2018

    Breytingar á fréttaveitu Facebook

    Facebook er alltaf að breyta og prófa sig áfram. Í dag kom tilkynning frá Mark Zuckerberg að breytingar á fréttaveitunni (e. News feed) væru í vændum. Til stendur að draga úr sýnileika og náttúrulegri dreifingu á efni frá fyrirtækjum og fréttasíðum. Facebook mun líka gera meiri kröfur til þess efnis sem fyrirtæki senda frá sér.
    Nánar
  • 11.12.2017

    Alls konar fyrir alla um jólin

    Það ætti engum að leiðast inniveran í desember. Nú keppast sjónvarpsstöðvarnar við að auglýsa hátíðardagskrána sem er glæsileg að vanda. Það er tilvalið að kasta jóla- og áramótakveðju á landann í sjónvarpi í kringum hátíðirnar. Dagskráin býður upp á eitthvað fyrir alla og nær til hins klassíska markhóps ALLIR.
    Nánar