Skipulagsbreytingar og stefnumótun

Miklar breytingar hafa verið síðustu 18 mánuði hjá Hvíta húsinu. Húsnæði og útlit fyrirtækisins hefur tekið stakkaskiptum í kjölfar stefnumótunarvinnu. Við fórum í gegnum jafnlaunavottunarferli hjá VR og fengum vottun um áramótin, ásamt því að endurskoða stjórnskipulag stofunnar, skerpa á verkskiptingu og ábyrgð stjórnenda. Nú í maíbyrjun voru eftirtaldar breytingar gerðar í takt við þá miklu vinnu sem ráðist var í.

Elín Helga Sveinbjörnsdóttir verður framkvæmdastjóri viðskiptastýringar og undir hana fellur hönnunarsvið og viðskiptastýring. Elín hefur starfað hjá okkur sl. 12 ár sem einn af aðalráðgjöfum stofunnar. Hún er einnig einn af eigendum stofunnar, núverandi stjórnarformaður SÍA (Sambands íslenskra auglýsingastofa) og forfallin kylfingur með forgjöf sem verður ekki gefin upp.   

Gísli S. Brynjólfsson verður framkvæmdastjóri viðskiptaþróunar og mun hann sjá um rekstur og fjármál, samskiptasvið og viðskiptaþróun. Gísli er einn af eigendum stofunnar og hefur starfað hjá Hvíta húsinu sl. 13 ár, aðallega við stefnumótunarráðgjöf og verið annar af tveimur framkvæmdastjórum stofunnar frá 2011. Hann er kappsamur og á sín augnablik seint á kvöldin í bumbubolta. 

Kristinn R. Árnason hefur starfað hjá okkur sl. 23 ár sem viðskiptastjóri og ráðgjafi. Frá 2011 hefur hann verið annar tveggja framkvæmdastjóra en verður nú fjármálastjóri. Hann er jafnframt einn af eigendum stofunnar og hefur gaman af útivist, ásamt því að veiða og sleppa fiskum.   

Öll þessi vinna miðar að því að gera stofuna öflugri og vinnuna betri fyrir starfsfólk okkar og viðskiptavini. Við erum ein elsta stofan á Íslandi og höfum starfað samfleytt frá árinu 1961 en alltaf gætt þess að vera fersk og fagleg. Sjálfsskoðun og stefnumótun eru mikilvægir þættir til að tryggja að ferskir vindar haldi áfram að blása. Það að nefna áhugamál og ástríður stjórnenda er bara til gamans gert og hefur ekkert með rekstur stofunnar að gera. 


  • 17.04.2019

    Góð hugmynda­söfnun

    Við elskum góðar hugmyndir. Þær eru okkar ær og kýr. Þess vegna ætti það ekki að koma neinum á óvart að árleg hugmyndasöfnun Reykjavíkurborgar er okkur ákaflega kært og skemmtilegt verkefni.
    Nánar
  • 14.02.2019

    Hvíta húsið heldur út í heim

    Eða svona næstum. Á dögunum gerðum við samstarfssamninga við þrjár stofur til þess að geta boðið viðskiptavinum okkar upp á enn breiðari þjónustu. Hvíta húsið er nú aðili að PR og samskiptastofunni FleishmanHillard, sem er með yfir 100 skrifstofur í 30 löndum og getur hjálpað íslenskum fyrirtækjum að ná alþjóðlegum eyrum (og augum).
    Nánar
  • 04.01.2019

    Halldór Guðmundsson

    Í dag kveðjum við í Hvíta húsinu okkar helsta leiðtoga. Að öðrum ólöstuðum hefur enginn haft eins mikil áhrif á hvernig við hugsum og vinnum og Halldór Guðmundsson, sem var framkvæmdastjóri stofunnar í 35 ár og stjórnarformaður í 12 til viðbótar. Við sendum fjölskyldu Halldórs og vinum hlýja strauma og munum halda áfram að reyna að gera hann stoltan og glaðan með verkum okkar um alla framtíð.
    Nánar
  • 18.12.2018

    Við erum öll í sjávarútvegi

    Sjávarútvegsráðstefnan hefur verið haldin árlega frá 2010 og er einn helsti vettvangur sjávarútvegsfyrirtækja og þeirra sem þjónusta þennan undirstöðuatvinnuveg til að hittast og kynna verk sín og hugmyndir.
    Nánar
  • 10.12.2018

    Myndmerki TERN Systems verðlaunað

    Nýverið hlaut merki sem hannað var hér á Hvíta húsinu verðlaun í WOLDA – Worldwide Logo Design Award.
    Nánar
  • 16.11.2018

    Hvíta húsið tilnefnt til alþjóðlegra auglýsinga­verðlauna

    Auglýsingar Klúbbsins Geysis um geðheilsu hlutu í haust tilnefningu til Global Awards, sem verðlauna framúrskarandi auglýsingar um heilsu og vellíðan. Hvíta húsið var þar í flokki með alþjóðlegum auglýsingastofum á borð við McCann, Havas og Mullen Lowe.
    Nánar
  • 17.10.2018

    Settu svip á umhverfið

    Bás á ráðstefnu eða vörusýningu – er það ekki svolítið eins og að auglýsa í blaði þar sem eru eintómar auglýsingar? Jú, en samt með þeim fyrirvara að allir (eða flestir) þeir sem sækja slíka viðburði hafa áhuga á því sem verið er að fjalla um. Engu að síður þarf talsvert átak til að fanga athyglina í umhverfi þar sem allir eru að reyna hið sama, jafnvel að tala um sama hlutinn.
    Nánar
  • 10.08.2018

    Er teikning kannski málið?

    Mynd segir meira en þúsund orð. Það eru ekkert margir áratugir síðan „mynd“ þýddi ekki sjálfkrafa „ljósmynd“ í hugum okkar, heldur málverk eða kannski öllu heldur: teikning. Þegar kemur að því að hitta naglann á höfuðið hefur teikningin ennþá oft forskotið sem hún hafði í hellunum þar sem forfeður okkar rissuðu upp myndir af loðfílum og annarri bráð.
    Nánar