Er brjálað að gera?

Unnið var með hugsjónina „að hafa brjálað að gera“, sem spratt upp úr umræðum um dugnað – hvort hann væri séríslenskt fyrirbæri, hversu rótgróið það er að vera duglegur og aðstæður sem flest allir sem að vinnunni komu könnuðust við: að eiga heilu samtölin sem snúast bara um að hversu upptekið fólk er. Þetta innsæi var leiðarljós allrar vinnunnar.

Framleiddar voru tíu auglýsingar sem hverfast allar í kringum sömu persónuna: Sigríði Halldórsdóttur. Ákveðið var að gera Sigríði að millistjórnanda svo hún gæti verið bæði fórnarlamb og gerandi í heimi sem leggur ofuráherslu á að hafa brjálað að gera. Sigríður finnur sig því bæði í þeim aðstæðum að missa bolta vegna álags í vinnu og einkalífi og fara yfir mörk undirmanna sinna.

Til þess að undirbúa jarðveginn var sett af stað herferð um svokölluð Beacons-snjallsímagleraugu. Þessi „teaser“-herferð fór af stað viku áður en jólaauglýsingin var birt og auglýsti vöru sem er ekki til í alvörunni: snjallsímagleraugu sem myndu gera notandanum kleift að nota snjallsímann sinn þótt slökkt væri á skjánum. Fáránleiki þess að vinna bara í þágu atvinnulífsins var hér tekinn skrefinu lengra.

Þegar jólaauglýsingin fór svo í birtingu sáu glöggir áhorfendur manni með Beacons-gleraugu bregða fyrir.